http://dharmawiki.org/index.php?action=history&feed=atom&title=Adiparva_Adhyaya_36_%28%E0%A4%86%E0%A4%A6%E0%A4%BF%E0%A4%AA%E0%A4%B0%E0%A5%8D%E0%A4%B5%E0%A4%A3%E0%A4%BF_%E0%A4%85%E0%A4%A7%E0%A5%8D%E0%A4%AF%E0%A4%BE%E0%A4%AF%E0%A4%83_%E0%A5%A9%E0%A5%AC%29 2026-05-05T23:43:04Z Revision history for this page on the wiki MediaWiki 1.35.4 http://dharmawiki.org/index.php?title=Adiparva_Adhyaya_36_(%E0%A4%86%E0%A4%A6%E0%A4%BF%E0%A4%AA%E0%A4%B0%E0%A5%8D%E0%A4%B5%E0%A4%A3%E0%A4%BF_%E0%A4%85%E0%A4%A7%E0%A5%8D%E0%A4%AF%E0%A4%BE%E0%A4%AF%E0%A4%83_%E0%A5%A9%E0%A5%AC)&diff=120705&oldid=prev 2019-10-16T11:32:41Z

<p>new pg</p> <p><b>New page</b></p><div>शौनक उवाच<br /> <br /> आख्याता भुजगास्तात वीर्यवन्तो दुरासदाः।<br /> <br /> शापं तं तेऽभिविज्ञाय कृतवन्तः किमुत्तरम्॥ 1-36-1<br /> <br /> सूत उवाच [सौतिरुवाच]<br /> <br /> तेषां तु भगवाञ्च्छेषः कद्रूं त्यक्त्वा महायशाः।<br /> <br /> उग्रं तपः समातस्थे वायुभक्षो यतव्रतः॥ 1-36-2<br /> <br /> गन्धमादनमासाद्य बदर्यां च तपोरतः।<br /> <br /> गोकर्णे पुष्करारण्ये तथा हिमवतस्तटे॥ 1-36-3<br /> <br /> तेषु तेषु च पुण्येषु तीर्थष्वायतनेषु च।<br /> <br /> एकान्तशीलो नियतः सततं विजितेन्द्रियः॥ 1-36-4<br /> <br /> तप्यमानं तपो घोरं तं ददर्श पितामहः।<br /> <br /> संशुष्कमांसत्वक्स्नायुं जटाचीरधरं मुनिम्॥ 1-36-5<br /> <br /> तमब्रवीत्सत्यधृतिं तप्यमानं पितामहः।<br /> <br /> किमिदं कुरुषे शेष प्रजानां स्वस्ति वै कुरु॥ 1-36-6<br /> <br /> त्वं हि तीव्रेण तपसा प्रजास्तापयसेऽनघ।<br /> <br /> ब्रूहि कामं च मे शेष यस्ते हृदि व्यवस्थितः॥ 1-36-7<br /> <br /> शेष उवाच<br /> <br /> सोदर्या मम सर्वे हि भ्रातरो मन्दचेतसः।<br /> <br /> सह तैर्नोत्सहे वस्तुं तद्भवाननुमन्यताम्॥ 1-36-8<br /> <br /> अभ्यसूयन्ति सततं परस्परममित्रवत्।<br /> <br /> ततोऽहं तप आतिष्ठं नैतान्पश्येयमित्युत॥ 1-36-9<br /> <br /> न मर्षयन्ति ससुतां सततं विनतां च ते।<br /> <br /> अस्माकं चापरो भ्राता वैनतेयोऽन्तरिक्षगः॥ 1-36-10<br /> <br /> तं च द्विषन्ति सततं स चापि बलवत्तरः।<br /> <br /> वरप्रदानात्स पितुः कश्यपस्य महात्मनः॥ 1-36-11<br /> <br /> सोऽहं तपः समास्थाय मोक्ष्यामीदं कलेवरम्।<br /> <br /> कथं मे प्रेत्यभावेऽपि न तैः स्यात्सह संगमः॥ 1-36-12<br /> <br /> तमेवंवादिनं शेषं पितामह उवाच ह।<br /> <br /> जानामि शेष सर्वेषां भ्रातॄणां ते विचेष्टितम्॥ 1-36-13<br /> <br /> मातुश्चाप्यपराधाद्वै भ्रातॄणां ते महद्भयम्।<br /> <br /> कृतोऽत्र परिहारश्च पूर्वमेव भुजङ्गम॥ 1-36-14<br /> <br /> भ्रातॄणां तव सर्वेषां न शोकं कर्तुमर्हसि।<br /> <br /> शापादस्मान्महाघोरादुक्तान्मात्रा महाबल।<br /> <br /> वृणीष्व च वरं मत्तः शेष यत्तेऽभिकाङ्क्षितम्॥ 1-36-15<br /> <br /> दास्यामि हि वरं तेऽद्य प्रीतिर्मे परमा त्वयि।<br /> <br /> दिष्ट्या बुद्धिश्च ते धर्मे निविष्टा पन्नगोत्तम।<br /> <br /> भूयो भूयश्च ते बुद्धिर्धर्मे भवतु सुस्थिरा॥ 1-36-16<br /> <br /> शेष उवाच<br /> <br /> एष एव वरो देव काङ्क्षितो मे पितामह।<br /> <br /> धर्मे मे रमतां बुद्धिः शमे तपसि चेश्वर॥ 1-36-17<br /> <br /> ब्रह्मोवाच<br /> <br /> प्रीतोऽस्म्यनेन ते शेष दमेन प्रश्रयोण च [च शमेन च]।<br /> <br /> त्वया त्विदं वचः कार्यं मन्नियोगात्प्रजाहितम्॥ 1-36-18<br /> <br /> इमां महीं शैलवनोपपन्नां ससागरग्रामविहारपत्तनाम्।<br /> <br /> त्वं शेष सम्यक्चलितां यथावत्संगृह्य तिष्ठस्व यथाचला स्यात्॥ 1-36-19<br /> <br /> शेष उवाच<br /> <br /> यथाह देवो वरदः प्रजापतिर्महीपतिर्भूतपतिर्जगत्पतिः।<br /> <br /> तथा महीं धारयितास्मि निश्चलां प्रयच्छतां मे शिरसि प्रजापते॥ 1-36-20<br /> <br /> ब्रह्मोवाच<br /> <br /> अधो महीं गच्छ भुजङ्गमोत्तम स्वयं तवैषा विवरं प्रदास्यति।<br /> <br /> इमां धरां धारयता त्वया हि मे महत्प्रियं शेष कृतं भविष्यति॥ 1-36-21<br /> <br /> सौतिरुवाच<br /> <br /> तथैव कृत्वा विवरं प्रविश्य स प्रभुर्भुवो भुजगवराग्रजः स्थितः।<br /> <br /> बिभर्ति देवीं शिरसा महीमिमां समुद्रनेमिं परिगृह्य सर्वतः॥ 1-36-22<br /> <br /> ब्रह्मोवाच<br /> <br /> शेषोऽसि नागोत्तम धर्मदेवो महीमिमां धारयसे यदेकः।<br /> <br /> अनन्तभोगैः परिगृह्य सर्वां यथाहमेवं बलभिद्यथा वा॥ 1-36-23<br /> <br /> सौतिरुवाच<br /> <br /> अधोभूमौ वसत्येवं नागोऽनन्तः प्रतापवान्।<br /> <br /> धारयन्वसुधामेकः शासनाद्ब्रह्मणो विभुः॥ 1-36-24<br /> <br /> सुपर्णं च सहायं वै भगवानमरोत्तमः।<br /> <br /> प्रादादनन्ताय तदा वैनतेयं पितामहः॥ 1-36-25<br /> <br /> (अनन्ते च प्रयाते तु वासुकिः सुमहाबलः।<br /> <br /> अभ्यषिच्यत नागैस्तु दैवतैरिव वासवः॥)<br /> <br /> इति श्रीमहाभारते आदिपर्वणि आस्तीकपर्वणि शेषवृत्तकथने षट्त्रिंशोऽध्यायः॥ 36 ॥</div>

P16459